ពលរដ្ឋស្នើឲ្យអាជ្ញាធរសង្កាត់ប៉ោយប៉ែត ពន្លឿនការដាក់លូ ធ្វើផ្លូវខាងកើតផ្សារអគ្គថ្មី ខណៈផ្អាកការធ្វើមួយសប្តាហ៍ទៅហើយនោះ
(បន្ទាយមានជ័យ) ប្រជាពលរដ្ឋស្នាក់នៅនិងប្រកបរបរលក់ដូរ នៅក្នុងបរិវេណផ្សារអគ្គថ្មីជ្រុងខាងកើត ស្ថិតនៅក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានរអ៊ូរទាំសម្ដែងការមិនសប្បាយចិត្ត ក្រោយពីក្រុមជាងបានផ្អាកការធ្វើរយៈពេលមួយសប្តាហ៍មកហើយនោះ ។
ពួកគាត់បានប្រាប់ភ្នាក់ងារយើងនាថ្ងៃទី០៥ ខែកញ្ញា ឆ្នាំ២០២៤ ថា អាជ្ញាធរបានប្រមូលលុយក្នុងមួយផ្ទះឬតូបចំនួន ៦៥០ដុល្លា ក្នុងការដាក់លូនឹងធ្វើផ្លូវបេតុង ដើម្បីឲ្យងាយស្រួលក្នុងការធ្វើដំណើរនិងលក់ដូរ តែបើធ្វើតែផ្លូវបេតុងវិញគឺយកតម្លៃក្នុងមួយផ្ទះឬតូប ចំនួន ៤៥០ដុល្លា ។ក្រោយពីប្រមូលលុយកក់ហើយនោះ បានដាក់គ្រឿងចក្រមកកាយដាក់លូមិនទាន់រួចផង ក៏ស្រាប់តែផ្អាកទៅវិញ គិតមកដលពេលនេះួយសប្តាហ៍ទៅហើយ ឯគ្រឿងចាក់(អេស្កាវ៉ូទ័រ)នៅបញ្ឈរចោល នៅពេលដែលសួរក្រុមជាងមិនឆ្លើយតប ។ដូច្នេះហើយទើបពួកគាត់ស្នើសុំឱ្យអាជ្ញាធរសង្កាត់ពន្លឿនក្នុងការដាក់លូ នឹងធ្វើផ្លូវបេតុងឲ្យបានឆាប់បន្តិច ដោយសារមានការរាំងស្ទះក្នុងការប្រកបរបររកទទួលទាន ពិសេសលក់ដូរតែម្ដង ខ្លះបិទទ្វារមិនបានលក់ ខ្លះទៀតលក់ ប៉ុន្តែលក់មិនសូវដាច់ដោយសារកាយដីនិងដាក់លូបាំងមុខផ្ទះឬតូប ពេលភ្លៀងផ្លូវរអិលពិបាកក្នុងការធ្វើដំណើរជាដើម។
ពាក់ព័ន្ធករណីខាងលើនេះលោក ភោគ លន ចៅសង្កាត់ប៉ោយប៉ែត បានប្រាប់ភ្នាក់ងារយើងតាមទូរសព្ទថា បញ្ហាខាងលើនេះដោយសារគ្រឿងចក្រខូចកំពុងតែយកគ្រឿងទៅធ្វើ មិនដឹងជាថ្ងៃណាទេបានធ្វើរួច មិនអាចកំណត់បាននោះទេ ។លោកបញ្ជាក់ថា ធម្មតាទេការធ្វើតែងតែមានការប៉ះពាល់ហើយ ធ្វើម៉េចបើយើងចង់ស្អាត បើលក់លើភួកក៏លក់មិនកើតមិនដាច់ បើយើងធ្វើស្អាតរួមគ្នាអភិវឌ្ឍន៍ទៅវាមានតម្លៃនិងលក់ដូរក៏ដាច់ ៕
