ក្រុមការងារសង្កាត់ប៉ោយប៉ែត បន្តការងារកាយដាក់លូធ្វើផ្លូវបេតុង នៅបរិវេណផ្សារអគ្គថ្មីជ្រុងខាងកើត ក្រោយពីអាក់ខានមួយសប្តាហ៍ ពលរដ្ឋស្នើសុំពន្លឿននៃការធ្វើ
(បន្ទាយមានជ័យ) ក្រោយពីអាជ្ញាធរសង្កាត់ប៉ោយប៉ែតផ្អាកការកាយដាក់លូធ្វើផ្លូវមួយរយៈនៅចំណុចបរិវេផ្សារអគ្គថ្មី ជ្រុងខាងកើត ស្ថិតនៅក្នុងភូមិបាលិលេយ្យ១ សង្កាត់/ក្រុងប៉ោយប៉ែត ខេត្តបន្ទាយមានជ័យ មកនោះ ពលរដ្ឋបានស្នើសុំឱ្យអាជ្ញាធរសង្កាត់ប៉ោយប៉ែតពន្លឿនការងារដាក់លូធ្វើផ្លូវបេតុងជូនពួកគាត់ឡើងវិញ ក្រោមហេតុផលរាំងស្ទះក្នុងការប្រកបរបររកទទួលទាន ពិសេសលក់ដូរតែម្ដង ខ្លះបិទទ្វារមិនបានលក់ ខ្លះទៀតលក់ប៉ុន្តែលក់មិនសូវដាច់ ដោយសារកាយដីនិងដាក់លូបាំងមុខផ្ទះឬតូប ពេលភ្លៀងផ្លូវរអិលពិបាកក្នុងការធ្វើជាដើម ខណៈពួកាត់បានចំណាយថវិការក្នុងការធ្វើ និងរហូតមានការផ្សព្វផ្សាយនៅលើបណ្ដាញសារព័ត៌មាន និងសង្គមមួយចំនួននោះ នាថ្ងៃទី០៨ ខែកញ្ញា ឆ្នាំ២០២៤ ក្រុមការងារសង្កាត់ប៉ោយប៉ែត ដឹកនាំដោយលោក ប៊ុន សុវទ្ធា ចៅសង្កាត់រងទី១ ស្ដីទី សង្កាត់ប៉ោយប៉ែត ទទួលបានការណែនាំពីលោក ភោគ លន ចៅសង្កាត់ប៉ោយប៉ែត បានបន្តការងារកាយដាក់លូធ្វើផ្លូវបេតុងជូនពលរដ្ឋឡើងវិញ ក្រោយពីមានការអាក់ខានមួយសប្តាហ៍មកនោះ។
លោក ប៊ុន សុវទ្ធា ចៅសង្កាត់រងទី១ ស្ដីទី សង្កាត់ប៉ោយប៉ែត បានឱ្យដឹងថា ការអាក់ខាននៃការកាយលូធ្វើផ្លូវបេតុងជូនពួកគាត់នេះគឺដោយសារគ្រឿងចក្រ(អេស្កាវ៉ូទ័រ)ខូចជួសជុលមិនទាន់ហើយ តែពេលនេះគ្រឿងចាក់បានធ្វើរួចរាល់ហើយដូច្នេះក្រុមការងារនិងបន្តពន្លឿនធ្វើឲ្យរួចរាល់ជាស្ថាពរនាពេលខាងមុខដ៏ខ្លីនេះ ។
ទន្ទឹមនោះលោកបានសន្យាចំពោះមុខពលរដ្ឋថា និងព្យាយាមធ្វើឲ្យរួចរាល់ជាស្ថាពរនាពេលខាងមុខដ៏ខ្លីនេះ បើមិនមានការរាំងស្ទះពីគ្រោះធម្មជាតិ(ភ្លៀង)ទេនោះ លោកទទួលស្គាល់ថាការអាក់ខានធ្វើនេះគឺវាប៉ះពាល់ដល់ប្រជាពលរដ្ឋក៏ពិតមែនប៉ុន្តែធ្វើម្ដេចបើគ្រឿងចក្រខូច ៕
