ពិធីអបអរសាទរខួបលើកទី២៦ ទិវាមនុស្សចាស់កម្ពុជា និងទិវាមនុស្សចាស់ អន្តរជាតិ ១តុលា ក្រោមប្រធានបទ “មនុស្សចាស់ក្នុងបរិវត្តកម្មឌីជីថល”
(បន្ទាយមានជ័យ) លោកស្រី រស់ សុផានី អភិបាលរង ខេត្តបន្ទាយមានជ័យ នាថ្ងៃទី២៣ ខែតុលា ឆ្នាំ២០២៤ អញ្ជើញជាធិបតីភាពក្នុងពិធីអបអរសាទរខួបលើកទី២៦ ទិវាមនុស្សចាស់កម្ពុជា និងទិវាមនុស្សចាស់ អន្តរជាតិ ១តុលា ក្រោមប្រធានបទ “មនុស្សចាស់ក្នុងបរិវត្តកម្មឌីជីថល” ដែលបានរៀបចំឡើង ដោយមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តបន្ទាយមានជ័យ។ពិធីនេះបានធ្វើឡើងនៅបរិវេណសាលាឃុំ សិង្ហ ស្រុកអូរជ្រៅ ដោយមានការចូលរួមពី អភិបាលរងស្រុកអូរជ្រៅ មន្ទីរជុំវិញខេត្ត និងជនវ័យចាស់ប្រមាណជា២០០នាក់។
លោក ឃុន វុទ្ធី ប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្តបន្ទាយមានជ័យ បានលើកឡើងថា មនុស្សចាស់ដែលមានអាយុចាប់ពី ៦០ឆ្នាំឡើង សរុបចំនួន ៧៤,១៨៣ នាក់ ស្រី៤១,៩៥៣នាក់ ក្នុងនោះមនុស្សចាស់ ចំនួន ១៨,៨៩៧នាក់ ស្រី ១០,២១២នាក់ បានទទួលប្រាក់ឧត្ថម្ភពីរាជរដ្ឋាភិបាលកម្ពុជា តាមរយៈកម្មវិធី កញ្ចប់គ្រួសារ។លោកបន្តថា៖សមាគមមនុស្សចាស់មានចំនួន ៦៧ឃុំ/សង្កាត់ ដំណើរការបាន ៤១ឃុំ សង្កាត់ មានចំនួន ៤៤ សមាគម (ដំណើរការល្អ ២១,ដំណើរការមធ្យម ១៥, ដំណើរការ ខ្សោយ ៨) សមាជិកសរុប ចំនួន ១៥,៤៤៨នាក់ ស្រី
៩,៦២០នាក់ ថវិកាសរុប ២៥៤,២៧៣,៧០០រៀល។
ក្នុងនោះសមាគមមនុស្សចាស់ក្នុងស្រុកអូរជ្រៅមានចំនួន ៧សមាគម ដំណើរការបាន ២ឃុំ មានចំនួន ៣សមាគម រួមមានៈ ឃុំសិង្ហចំនួន ២សមាគម ឃុំកូបចំនួន ១សមាគម សមាជិកសរុប ៥៩៩នាក់ ស្រី ៣៥២នាក់ ស្មើនឹងទឹកប្រាក់ ២៥,៩៣០,០០០រៀល។
ទន្ទឹមនឹងនេះក៏មានសមាគមមូលនិធិមនុស្សវ័យចាស់ខេត្តបន្ទាយមានជ័យ ដឹកនាំដោយ ឯកឧត្តម កែ គឹមយ៉ាន តំណាងរាស្ត្រមណ្ឌលខេត្តបន្ទាយមានជ័យ និងជាឧត្តមប្រឹក្សា ព្រះមហាក្សត្រនៃព្រះរាជាណាចក្រកម្ពុជា មានការយកចិត្តទុក្ខដាក់ខ្ពស់ចំពោះមនុស្សវ័យចាស់ដោយមិនទុកឲ្យនរណាម្នាក់ឯកោនោះទេ។ កន្លងមកសមាគមបានចុះសួរសុខទុក្ខ និងចែក អំណោយដល់ជនចាស់ជរាក្រីក្រចាប់ពីអាយុ ៧០ឆ្នាំឡើង ចំនួន ២៤២២នាក់, ក្នុងម្នាក់ៗទទួល បានឃីត០១កញ្ចប់ និងថវិកាមួយចំនួន។
ក្នុងឱកាសនោះ លោកស្រី រស់ សុផានី អភិបាលរងខេត្ត បានថ្លែងថា ការបង្កើតសមាគមមនុស្សចាស់ឃុំ សង្កាត់ មានគោលបំណងលើកកម្ពស់ជីវភាព និងបណ្តាញសុវត្ថិភាព តាមរយៈការគាំទ្រពីសហគមន៍ខ្លួនឯង សប្បុរសជន អង្គការសង្គមស៊ីវិល ម្ចាស់ជំនួយ អាជ្ញាធរមូលដ្ឋាន វិស័យឯកជន និងរាជរដ្ឋាភិបាល ជំរុញការថែទាំសុខុមាលភាព និងសេចក្តីថ្លៃថ្នូររបស់មនុស្សចាស់ក្នុងសហគមន៍ តាមរយៈសកម្មភាពសង្គមកិច្ច មនុស្សធម៌ និងការចូលរួមរបស់ក្រុមគ្រួសារ សហគមន៍ និងមណ្ឌលសុខភាព។ ហើយមនុស្សចាស់ក៏ត្រូវទទួល បានការពិនិត្យ និងព្យាបាលដោយឥតគិតថ្លៃពីសេវាសុខុមាលភាពរបស់រដ្ឋ តាមរយៈការផ្តល់ប័ណ្ណ សមធម៌ ពីរាជរដ្ឋាភិបាលនិងកំពុងផ្តោតការយកចិត្តទុកដាក់ខ្ពស់ក្នុងការលើកកម្ពស់ជីវភាពរស់នៅ និងសុខុមាលភាពរបស់មនុស្សវ័យចាស់ផងដែរ៕
