ឆ្លងចរន្តអគ្គិសនី ឆេះរោងចក្រដាសកាតុង និងកាត់ដេរ នៅខណ្ឌពោធិ៍សែនជ័យ សំណាងមិនមានអ្នករងគ្រោះថ្នាក់
(ភ្នំពេញ)៖នៅវេលាម៉ោង ០០និង១០នាទីអធ្រាត្រ ថ្ងៃទី២៥ ខែតុលា ឆ្នាំ២០២៤ មានករណីអគ្គីភ័យមួយមានបានឆាបឆេះរោងចក្រក្រដាសកាតុង និងរោងចក្រកាត់ដេរ នៅចំណុចរោងចក្រ ជិន យូ ហ្វេង ភែកឃីង ខាថិន ឯ.ក ផ្លូវបេតុង ស្ថិតនៅក្នុងភូមិស្រែជំរៅ សង្កាត់ចោមចៅទី០២ ខណ្ឌពោធិ៍សែនជ័យ រាជធានីភ្នំពេញ បង្កការភ្ញាក់ផ្អើល សំណាងហើយមិនបង្កគ្រោះថ្នាក់ដល់មនុស្ស។ក្រោយពីទទួលបានព័ត៌មាននេះភ្លាមអាជ្ញាធរមូលដ្ឋាន និងកម្លាំងសមត្ថកិច្ច បាននាំយករថយន្តពន្លត់អគ្គីភ័យជាច្រើនគ្រឿងចុះជួយអន្តរាគមន៍ភ្លាមៗ។
សមត្ថកិច្ចបានឲ្យដឹងថា ម្ចាស់ទីតាំងមានឈ្មោះ YU YUAN FENG ភេទប្រុស អាយុ ៤១ឆ្នាំជាជនជាតិចិន មុខរបរ អ្នកគ្រប់គ្រង ។មូលហេតុដែលបង្កឲ្យមានគ្រោះអគ្គីភ័យនេះកើតឡើងគឺបណ្តាលមកពី ឆ្លងចរន្តអគ្គិសនីនៅបន្ទប់ជាន់ឡៅតឿ នៃរោងចក្រផលិតក្រដាសកាតុង ប្រភេទសំណង់ដែកប្រក់សង្ក័សី ទំហំ៤០ម៉ែត្រX៨៦ម៉ែត្រ បណ្តាលឲ្យខូចខាតសម្ភារៈអស់ទាំងស្រុង រួចបន្តឆេះរាលដាលដល់រោងចក្រកាត់ដេរ ដែលមានទំហំ(៤០ម៉ែត្រx៨៦ម៉ែត្រ) ខូចខាតអស់ប្រហែល ៤០ភាគរយ និងសម្ភារៈខូចខាតអស់៧០ភាគរយ ។
សមត្ថកិច្ចបញ្ជាក់ថា ក្នុងហេតុការណ៍គ្រោះអគ្គីភ័យនេះមិនមានអ្នករងរបួសនិងស្លាប់ឡើយ ។កម្លាំងសមត្ថកិច្ចបានប្រើប្រាសរថយន្តពន្លត់អគ្គីភ័យមកពីការិយាល័យអគ្គិភ័យ ចំនួន ២១គ្រឿង ដោយប្រើប្រាស់ទឹកអស់ចំនួន ១៨០ឡាន ស្មើរនឹង ៧២០ម៉ែត្រគូប រថយន្តជំនួយកងពលតូចង៧០ ចំនួន ០៦គ្រឿង ប្រើប្រាស់ទឹកអស់ចំនួន ២៤ឡាន ស្មើរនឹង ៩៦ម៉ែត្រគូប ,រថយន្តក្រុមហ៊ុនស្រាបៀរកម្ពុជាចំនួន ០១គ្រឿង ប្រើប្រាស់ទឹកអស់ចំនួន ០២ឡាន ស្មើនឹង ១២ម៉ែត្រគូប ទើបគ្រប់គ្រងស្ថានការបាននៅម៉ោង ១១នឹង០០នាទីព្រឹក នាថ្ងៃខែ ឆ្នាំដដែល ៕
