រថយន្ត ៣គ្រឿង បុកគ្នាពេញទំហឹង បណ្ដាលឱ្យជនជាតិចិន ២នាក់បានស្លាប់ភ្លាមៗ នៅបណ្ដោយផ្លូវជាតិលេខ១ ក្នុងស្រុកកៀនស្វាយ
ខេត្តកណ្តាល៖រថយន្ត៣គ្រឿងបានបុកគ្នាពេញទំហឹងនាព្រឹកថ្ងៃទី២៨ ខែតុលា ឆ្នាំ២០២៤ នៅលើបណ្ដោយផ្លូវជាតិលេខ ១ ស្ថិតនៅក្នុងភូមិពោធិ៍មាវ ឃុំគគីធំ ស្រុកកៀនស្វាយ ខេត្តកណ្ដាល បណ្ដាលឲ្យជនជាតិជន ២នាក់ បានស្លាប់នៅនឹងកន្លែងកើតហេតុ ។
បើតាមប្រភពពីកន្លែងកើតហេតុបានអោយដឹងថា មុនពេលកើតហេតុបានឃើញរថយន្តបង្កមួយគ្រឿងម៉ាក់រ៉ាត់ទ័រពណ៌ខ្មៅ ពាក់ស្លាកលេខ កម្ពុជា NQPKARIN បើកបរក្នុងទិសដៅពីកើតទៅលិចបើកបរដោយជនជាតិចិន និងអ្នករួមដំណើរ ៣នាក់ទៀតមិនស្គាល់អត្តសញ្ញាណ លុះមកដល់ចំណុចកើតហេតុខាងលើបានឡើងវ៉ាជែងរថយន្តមួយគ្រឿងម៉ាក់ហាយឡែនឌឺពណ៌ក្រហម ពាក់ស្លាកលេខ ភ្នំពេញ 2AS-4195 បើកបរទិសដៅស្របគ្នា រួចក៏បានទៅបុកនិងរថយន្តក្រុងក្រុមហ៊ុន ដាន ដាន កម្ពុជា–វៀតណាម ដឹកអ្នកដំណើរទិសដៅបញ្ច្រាសទិសគ្នា ពីលិចទៅកើតឆ្ពោះទៅក្រុងបាវិតបង្កអោយបុក ចំពេញពីមុខ មួយទំហឹង បណ្ដាលឲ្យអ្នកបើកបរនិងអ្នករួមដំណើរអង្គុយពីមុខស្លាប់ចំនួន២នាក់ នៅនឹងកន្លែងកើតហេតុអ្នករួមដំណើរអង្គុយពីក្រោយ ២នាក់រងរបួសស្រាល។
ចំណែករថយន្តហាយឡេនឌ័រ បានជ្រុលចង្កូតទៅបុកជាមួយនឹងរថយន្តបង្ករម៉ាក់រ៉ាត់ទ័រ បណ្តាលឲ្យរងការខូចខាតយ៉ាងដំណំផ្នែកខាងមុខ។
ក្រោយពីកើតហេតុរថយន្តទាំង៣គ្រឿង ត្រូវបានកម្លាំងជំនាញ ចរាចរណ៍នៃអធិការស្រុកកៀនស្វាយចុះទៅពិនិត្យនិងធ្វើការវាស់វែង រឺឯសាកសពជនរងគ្រោះ រង់ចាំពិនិត្យនិងប្រគល់ជូនសាច់ញាតធ្វើបុណ្យតាមប្រពៃណី៕
