គ្រោះថ្នាក់ចរាចរណ៍រវាងរថយន្តនិងរថយន្ត រួចជ្រុលទៅបុកផាសអេប ០១គ្រឿងទៀត បណ្តាលឲ្យមនុស្សប្រុសស្រី ៣នាក់រងរបួស ត្រូវបានដឹកបញ្ជូនទៅកាន់មន្ទីរពេទ្យ
(បន្ទាយមានជ័យ)៖មនុស្សប្រុសស្រីចំនួន ៣នាក់បានរងរបួស ត្រូវបានដឹកបញ្ជូនទៅកាន់មន្ទីរពេទ្យ ក្នុងហេតុការណ៍គ្រោះថ្នាក់ចរាចរណ៍រវាងរថយន្តនិងរថយន្ត រួចជ្រុលទៅបុកផាសអេប ០១គ្រឿងទៀតវេលាម៉ោង០៤ និង២០នាទី ថ្ងៃទី០៥ ខែវិច្ឆិកា ឆ្នាំ២០២៤ នៅលើផ្លូវជាតិលេខ៥ ត្រង់ចំណុចមុខសណ្ឋាគារសុងដារ៉ា ស្ថិតក្នុងភូមិបាលិលេយ្យ២ សង្កាត់/ក្រុងប៉ោយប៉ែត ខេត្តបន្ទាយមានជ័យ ។
ប្រភពព័ត៌មានបានឲ្យដឹងថា មុនពេលកើតហេតុមានរថយន្តមួយគ្រឿងម៉ាកតូយូតាកាមរី ពណ៌ស ពាក់ស្លាកលេខ ភ្នំពេញ 2BM-9100 បើកបរក្នុងទិសដៅពីលិចទៅកើតលុះមកដល់ចំណុចកើតហេតុបានឡើងជែងរថយន្តពីមុខក្នុងស្ថានភាពគ្រោះថ្នាក់ មេឃកំពុងមានភ្លៀង ហើយទៅបុករថយន្តម៉ាកហ៊ីយ៉ានដាយស្តារិច ពណ៌ស ពាក់ផ្លាកលេខ ភ្នំពេញ 2BX-8762 បើកបរពីកើតទៅលិច(ច្រាសទិសគ្នា) បន្ទាប់មករថយន្តកាមរីខាងលើ បានជ្រុលទៅបុកម៉ូតូកង់បី(ផាសអេប)មួយគ្រឿងទៀតម៉ាក បាចា ពណ៌ស ពុំមានផ្លាកលេខ បើកបរពីលិចទៅកើត បណ្តាលឲ្យមនុស្សមានអ្នករងរបួសតែម្តង ក្រោយពីកើតហេតុអ្នកបើកបររថយន្តកាមរី ទុករថយន្ត ចុះរត់គេចខ្លួនបាត់សស្រមោល ។
សមត្ថកិច្ចបានឲ្យដឹងថា ស្ត្រី ២នាក់ដែលរួមដំណើរលើម៉ូតូកង់បី(ផាសអេប) រងរបួសត្រូវបានដឹកបញ្ជូនទៅសង្គ្រោះនៅឯមន្ទីរពេទ្យ ចំណែកអ្នកបើកបរ ឈ្មោះ ជៀប បញ្ញា ភេទប្រុស អាយុ៣៤ឆ្នាំ មុខរបររត់ផាស់អេបពុំមានរងរបួសទេ។ដោយឡែកអ្នកបើកបររថយន្តស្តារិចឈ្មោះ រុង រស្មី ភេទប្រុស អាយុ៤០ឆ្នាំ រស់នៅក្នុងភូមិទួលសង្កែ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ
(រងបួស)ត្រូវបានសាច់ញាតិដឹកទៅមន្ទីរពេទ្យ។
សមត្ថកិច្ចបញ្ជាក់ថា ម៉ូតូផាស់អេប (ខូចខាតស្រាល) រថយន្តកាមរី (ខូចខាតធ្ងន់) រថយន្តស្តារិច(ខូចខាតធ្ងន់)។ក្រោយពីវាសវែងរួច បាននាំយកមធ្យោបាយទាំងបីខាងលើទៅរក្សាទុកនៅអធិការដ្ឋាននគរបាលក្រុងប៉ោយប៉ែតរងចាំដោះស្រាយគ្នាជាក្រោយ៕
