ឯកឧត្តម បណ្ឌិត ហ៊ុន ម៉ាណែត អញ្ជើញសំណេះសំណាលជាមួយក្រុមការងារ និងក្រុមសកម្មនៃយុវជនទូទាំងខេត្តកំពង់ចាម
ខេត្តកំពង់ចាម៖នៅព្រឹកថ្ងៃទី២៣ ខែឧសភា ឆ្នាំ២០២២ ឯកឧត្តម បណ្ឌិត ហ៊ុន ម៉ាណែត សមាជិកគណៈកម្មការអចិន្ត្រៃយ៍គណៈកម្មាធិការកណ្ដាល និងជាប្រធានយុវជនគណបក្សប្រជាជនកម្ពុជាថ្នាក់កណ្ដាល អញ្ជើញសំណាលជាមួយក្រុមការងារ និងក្រុមសកម្មនៃយុវជនទូទាំងខេត្តកំពង់ចាម។
ពិធីនេះបានធ្វើឡើងនៅសាលប្រជុំសសរ១០០ សម្ដេចតេជោ ក្រុងកំពង់ចាម ដោយមានការអញ្ជើញចូលរួមពីឯកឧត្តម អ៊ុន ចាន់ដា សមាជិកគណៈកម្មាធិការកណ្ដាល និងជាប្រធានគណបក្សប្រជាជនកម្ពុជាខេត្តកំពង់ចាម ឯកឧត្តម ខ្លូត ផន អនុប្រធានគណៈប្រចាំការគណបក្សខេត្ត ប្រធាន អនុប្រធានក្រុមការងារគណបក្សចុះជួយក្រុង ស្រុក ឃុំ សង្កាត់ គណៈអចិន្ត្រៃយ៍បក្សខេត្ត ក្រុង ស្រុក ឃុំសង្កាត់ ក្រុមការងារ យុវជនគណបក្សខេត្ត ក្រុង ស្រុក ឃុំ សង្កាត់ រួមនឹងសមាជិក សមាជិកាយុវជនប្រមាណជិត ១៥០០ នាក់ ផងដែរ។
មានប្រសាសសំណេះសំណាលក្នុងឱកាសនោះ ឯកឧត្ដមបណ្ឌិតហ៊ុនម៉ាណែត បានផ្ដាំផ្ញើរអោយជនបង្គោលសកម្មជននិងយុវជនគណបក្សទាំងអស់ ត្រូវបញ្ចេញសកម្មភាពនូវអំពើល្អ ដើម្បីអូសទាញទឹកចិត្តប្រជាពលរដ្ឋអោយស្រឡាញ់ និងគាំទ្រគណបក្សប្រជាជន ចេះនិយាយរឿងពិតដែលជាអំពើល្អរបស់គណបក្ស ហើយចាត់វិធានការវាយបកទៅលើការនិយាយបង្ខូចបង្កាច់មកលើគណបក្សប្រជាជន។
ឯកឧត្ដមបណ្ឌិតបានប្រៀបធៀបទង្វើររបស់គណបក្សប្រឆាំងដូចជាសិស្ស ដែលមិនចូលសាលាលុះដល់ពេលប្រលងដាក់ពាក្យហើយលួចចំលងពីគណបក្សប្រជាជន ដូច្នេះយើងត្រូវតែរួមគ្នាបញ្ចេញសកម្មភាពចាប់ពីពេលនេះតទៅ ៕
