បើកការដ្ឋានសាងសង់ ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ នៅក្រុងសិរីសោភ័ណ ក្រោមឥណទានសម្បទានពីធនាគារអភិវឌ្ឍន៍អាស៊ី (ADB)
ខេត្តបន្ទាយមានជ័យ៖ការអភិវឌ្ឍន៍កន្លែងណាមួយ គឺតែងតែមានផលប៉ះពាល់រំខានដល់ការប្រកបរបររកស៊ីរបស់បងប្អូនខ្លះហើយ ដូចនេះតម្រូវឲ្យបងប្អូនប្រជាពលរដ្ឋ មេត្តាចូលរួមសហការ។ នេះបើតាមការលើកឡើងរបស់ឯកឧត្តម វង្ស ពិសិដ្ឋ អនុរដ្ឋលេខាធិការ ក្រសួងសាធារណៈការនិងដឹកជញ្ជូនក្នុងពិធីក្រុងពលី បើកការដ្ឋានអនុគម្រោងសាងសង់ប្រព័ន្ធលូ និងស្ថានីយប្រព្រឹត្តិកម្ម ទឹកកខ្វក់ នៅក្នុងក្រុងសិរីសោភ័ណ នៃគម្រោងកែលម្អគ្រប់គ្រងបរិស្ថាន ក្រុងជុំវិញបឹងទន្លេសាបជំហាន ២ នាព្រឹកថ្ងៃទី១១ ខែកុម្ភៈ ឆ្នាំ២០២២។
លោក សុក ចាន់ថា ប្រធានមន្ទីរសាធារណៈការ និងដឹកជញ្ជូនខេត្តបន្ទាយមានជ័យ បានមានមតិចូលរួមជាបច្ចេកទេសបញ្ជាក់ថា គម្រោងប្រព័ន្ធបង្ហូរទឹកកខ្វក់ និងប្រព័ន្ធបង្ហូរទឹកភ្លៀង ព្រមទាំងសាងសង់ស្ថានីយប្រព្រឹត្តកម្ម ទឹកកខ្វក់ទទួលការសាងសង់ដោយក្រុមហ៊ុន Beijing urban construction group co,LTD (BUCG) ត្រួតពិនិត្យបច្ចេកទេសដោយក្រុមហ៊ុន Romboll Denmark A/S In Joint Venture With Oriental Consultant and Sec In Association With Tancons ចំណាយថវិកាសរុបប្រមាណ ២២,៤៨៦,១៧៩ដុល្លារ ក្រោមឥណទានសម្បទានពីធនាគារអភិវឌ្ឍន៍អាស៊ី (ADB) រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សម្រាប់ការងារដោះស្រាយផលប៉ះពាល់ បោសសម្អាតគ្រាប់មីន និងយុទ្ធភ័ណ្ឌមិនទាន់ផ្ទុះ ដោយប្រើរយៈពេលសាងសង់ ៣៦ខែ ដែលគ្រងនឹងបញ្ចប់នៅខែសីហាឆ្នាំ២០២៤។
ស្ថានីយ៍ប្រព្រឹត្តកម្មទឹកកខ្វក់ មានសមត្ថភាពអាចចម្រោះបានចំនួន ៣៥០០ម ៣ ក្នុងមួយថ្ងៃ សាងសង់លើផ្ទៃដីប្រមាណ ២៤ហិចតា ដែលក្នុងនោះរួមមានអាគារចំនួន ០៤(អាគាររដ្ឋបាល រោងជាង រោងម៉ាស៊ីនភ្លើង និងអាគារសន្តិសុខ) ស្ថិតនៅក្នុងភូមិកន្ទួត សង្កាត់ភ្នៀត ក្រុងសិរីសោភ័ណ។
ការសាងសង់ប្រព័ន្ធដាច់ដោយឡែកសម្រាប់តំបន់សេវាកម្ម ភាគពាយព្យនៃស្ទឹងសិរីសោភ័ណ ដែលមានបំពង់បង្ហូរប្រវែង ១១០គីឡូម៉ែត្រ និងស្ថានីយបូមមេ ១កន្លែង និងស្ថានីយបូមតូចចំនួន ៣ កន្លែង។គម្រោងនេះនឹងធ្វើការសាងសង់ផ្លូវចូលទៅកាន់ស្ថានីយប្រព្រឹត្តកម្មដែលមានប្រវែង ២៦០០ ម៉ែត្រ និងបណ្ដាញលូបង្ហូរទឹកភ្លៀងប្រវែង ៦៨៨៥ម៉ែត្រ។
លោក លី សារី អភិបាលរងខេត្តបន្ទាយមានជ័យបានមានប្រសាសន៍ថា បរិស្ថាននៃការរស់នៅពិតជាមានសារៈសំខាន់ណាស់ ដែលទាមទារជាចាំបាច់នូវការរៀបចំយកចិត្តទុកដាក់ ប្រកបដោយសោភ័ណភាព ផាសុខភាព ព្រោះវាជាប្រភពផ្ដល់សុខភាពល្អដល់យើង “សុខភាពជាទ្រព្យសម្បត្តិទីមួយ មុននឹងយើងអាចទៅរកទ្រព្យសម្បត្តិដទៃទៀតបាន“។ជាពិសេសការរៀបចំបរិស្ថាន សោភ័ណភាពក្នុងទីប្រជុំជន គឺជាចំណុចអាទិភាព ទីក្រុងស្អាត ទាក់ទាញភ្ញៀវទេសចរណ៍។
ក្នុងនោះលោកក៏បានសម្តែងការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងមន្ត្រីមន្ទីរជំនាញទាំងអស់ ក្នុងប៉ុន្មានឆ្នាំកន្លងទៅនេះ ក្នុងការអនុគម្រោងសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ក្រុងសិរីសោភ័ណ នៃគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហាន ២ខេត្តបន្ទាយមានជ័យ។និងថ្លែងអំណរគុណ ចំពោះមន្ទីរពាក់ព័ន្ធនានា ពិសេស មន្ទីរសាធារណការ និងដឹកជញ្ជូន រួមជាមួយអាជ្ញាធរក្រុង អាជ្ញាធរសង្កាត់ និងភូមិដែលមានចូលរួមសហការជាមួយ ក្រុមការងារក្រសួងសាធារណការ និងដឹកជញ្ជូន ទីប្រឹក្សាបច្ចេកទេស ធនាគារអភិវឌ្ឍន៍អាស៊ី (ADB) និងក្រុមហ៊ុនសាងសង់ដែលបានរួមគ្នាអនុវត្តការងារនេះតាំងពីចាប់ផ្ដើម រហូតមកដល់ពេលនេះ៕
