ស្ត្រីនគរបាលប៉ុស្តិ៍រដ្ឋបាលឃុំក្របៅ និងប្អូនប្រុស ជួបគ្រោះថ្នាក់ចរាចរណ៍ក្រឡាប់រថយន្តចូលប្រឡាយទឹកស្លាប់ ខណៈពេលកំពុងចុះបំពេញការងារតាមការិយាល័យបោះឆ្នោត
(ព្រៃវែង)៖ស្ត្រីជានគរបាលប៉ុស្តិ៍រដ្ឋបាលឃុំក្របៅម្នាក់ និងអ្នកបើកបរជាប្អូនប្រុសបង្កើត បានជួបគ្រោះថ្នាក់ចរាចរណ៍ដោយក្រឡាប់រថយន្តធ្លាក់ចូលប្រឡាយទឹក បណ្ដាលឱ្យស្លាប់បាត់បង់ជីវិត កាលពីថ្ងៃទី៥ ខែមិថុនា ឆ្នាំ២០២២ ស្ថិតនៅភូមិសំបូ ឃុំជាច ស្រុកកំចាយមារ ខេត្តព្រៃវែង ក្នុងខណៈដែលកំពុងចុះបំពេញការងារតាមការិយាល័យបោះឆ្នោត។
អធិការនគរបាលស្រុកកំចាយមារ បានឲ្យដឹងថា ស្រ្តីរងគ្រោះមានឈ្មោះ សួង សុភាក់ អាយុ២៨ឆ្នាំ រស់នៅភូមិអណ្ដូងស្អាត ឃុំក្របៅ ស្រុកកំចាយមារ ជាមន្រ្តីនគរបាលជាតិ នៅប៉ុស្ដិ៍រដ្ឋបាលក្របៅ នៃអធិការដ្ឋាននគរបាលកំចាយមារ និងប្អូនប្រុសឈ្មោះ សួង វិសាល អាយុ១៥ឆ្នាំ។
លោកបញ្ជាក់ថា ជនរងគ្រោះទាំងពីរនាក់ខាងងលើ ត្រូវបានប្រជាពលរដ្ឋ និងសមត្ថកិច្ច ជួយសង្គ្រោះបន្ទាន់ តែមិនអាចជួយបាន ពោលបានស្លាប់ពេលបញ្ជូនទៅកាន់មន្ទីរពេទ្យ។ក្នុងនោះលោកអធិការក៏បានចូលរួមសោកស្ដាយ និងចូលរួមរំលែកទុក្ខដល់ក្រុមគ្រួសារសព ដែលបានបាត់បង់មន្ត្រីនគរបាលយ៉ាងសកម្មម្នាក់ ក្នុងការបំពេញភារកិច្ចជូនជាតិមាតុភូមិ៕
