ឯកឧត្តម ឈិត សុខុន ៖សាមគ្គីភាពជាចលករនៃសន្តិភាព “សង្ឃស្ស សមគ្គី សមគ្គានំតបោសុខោ” ការព្រមព្រៀងគ្នា ការស្រុះស្រួលឯកភាព របស់អង្គភាពនាំមកនូវសេចក្ដីសុខ
(បន្ទាយមានជ័យ)៖ថ្លែងក្នុងឱកាសអញ្ជើញចុះសាកសួរសុខទុក្ខ និងសំណេះសំណាលជាមួយមន្ត្រីក្រោមឱវាទនៃមន្ទីរធម្មការនិងសាសនាខេត្តបន្ទាយមានជ័យ កាលពីរសៀលថ្ងៃទី៣០ ខែមិថុនា ឆ្នាំ២០២២ មុនពេលអញ្ជើញចូលរួមក្នុងពិធី ទិវាមច្ឆាជាតិ ១ កក្កដា ២០២២ ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិតប៊ុនរ៉ានី ហ៊ុន សែន នៅអាងទឹកត្រពាំងថ្ម ក្នុងឃុំប៉ោយចារ ស្រុកភ្នំស្រុកនោះឯកឧត្តម ឈិត សុខុន រដ្ឋមន្ត្រីក្រសួងធម្មការនិងសាសនា បានលើកឡើងថា សាមគ្គីភាពជាចលករនៃសន្តិភាព “សង្ឃស្ស សមគ្គី សមគ្គានំតបោសុខោ” ការព្រមព្រៀងគ្នា ការស្រុះស្រួលឯកភាព របស់អង្គភាពនាំមកនូវសេចក្ដីសុខ។
បន្ទាប់ពីលោក បៀវ ថាន ប្រធានមន្ទីរធម្មការនិងសាសនាខេត្តបានឡើងរាយការណ៍ពីស្ថានភាពសង្ខេបរួចមក ឯកឧត្តម ឈិត សុខុន បានធ្វើការកោតសរសើរនិងវាយតម្លៃខ្ពស់ ចំពោះថ្នាក់ដឹកនាំមន្ទីរព្រមទាំងមន្ត្រីរាជការទាំងអស់ បានខិតខំបំពេញភារកិច្ចរបស់ខ្លួនទទួលបានជោគជ័យ ជាពិសេសមន្ត្រីយើងបានចូលរួមសហការជាមួយព្រះមន្ត្រីសង្ឃ ព្រះសង្ឃគ្រប់ឋានានុក្រម ដើម្បីបម្រើឲ្យផលប្រយោជន៍នៃការបង្កើតធ្លុងសាមគ្គីក្នុងជួរព្រះសង្ឃនិងពុទ្ធសាសនិក សម្រាប់ប្រមូលផ្ដុំគំនិតបញ្ញាញាណដ៏ទូលំទូលាយ រិៈរកវិធានការសមស្រប ដើម្បីរួមចំណែកកាត់បន្ថយលុបបំបាត់អំពើអកុសល អំពើហិង្សាទាំងឡាយទាំងពួង ដើម្បីឈោងចាប់យកសុខសន្តិភាពពេញលិញ ទាំងសុខុមាលភាពផ្លូវកាយផ្លូវចិត្ត។
ជាមួយគ្នានោះដែរឯកឧត្តម ឈិត សុខុន បានមានប្រសាសន៍សង្កត់ធ្ងន់ថា រាល់ការងារអ្វីដែលទទួលបានជោគជ័យនោះ គឺយើងមិនអាចធ្វើតែម្នាក់ឯងបាននោះឡើយ គឺត្រូវការចូលរួមពីសំណាក់មន្ត្រីក្រោមឱវាទទើបប្រសើរ សំខាន់សាមគ្គីភាពផ្ទៃក្នុងចេះយោគយល់ អធ្យាស្រ័យ អត់ឱន ដើម្បីអង្គភាពក៏ដូចជាសង្គមជាតិទាំងមូល ព្រោះយើងបានដឹងមកហើយថា ពីអតីតកាលកន្លងមកមូលហេតុយើងមិនសាមគ្គីភាពគ្នានោះហើយ ទើបយើងបែកបាក់ធ្វើឲ្យមនុស្សស្លាប់រាប់លាននាក់ តែបច្ចុប្បន្នដែលមានការដឹកនាំដ៏ឈ្លាសវៃរបស់ សម្ដេចតេជោ ហ៊ុន សែន ធ្វើអោយប្រទេសជាតិទទួលបានសុខសន្តិភាពនិងមានការអភិវឌ្ឍលើគ្រប់វិស័យ។ចុងក្រោយឯកឧត្តមបានឧបត្ថមថវិការមួយចំនួនដល់មន្ទីរធម្មការនិងសាសនាខេត្ត និងបានចុះពិនិត្យកន្លែងបំពេញការងាររបស់មន្ត្រីរាជការផងដែរ ៕
