ខេត្តបន្ទាយមានជ័យ៖ជនសង្ស័យ ១នាក់ ត្រូវកម្លាំងនគរបាលស្រុកថ្មពួក ចាប់ឃាត់ខ្លួន កាលពីវេលាម៉ោង៤ និង៣០នាទីទៀបភ្លឺ ថ្ងៃទី៤ ខែកុម្ភៈ ឆ្នាំ២០២២ ពាក់ព័ន្ធករណី លួចម៉ូតូរបស់ប្រជាពលរដ្ឋនៅភូមិធ្លក ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។
នគរបាលបានឲ្យដឹងថា ជនសង្ស័យមានគ្នា២នាក់ បានធ្វើសកម្មភាពចូលលួចម៉ូតូ ១គ្រឿង ម៉ាកវេវអាវកាច់ ម៉ាស៊ីន១១០សេសេ លេខម៉ាស៊ីន 20 78 403 ពណ៌ ក្រហម–ខ្មៅ សេរីឆ្នាំ២០១៩ គ្មានពន្ធ គ្មានស្លាកលេខ ដែលម្ចាស់បានចតទុក មុខផ្ទះទាំងសោរ។នៅពេលកំពុងលួចម្ចាស់បានឭសំលេងម៉ូតូរោទិ៍ ក៏ភ្ញាក់ដឹងថា មានចោរលួចម៉ូតូរបស់ខ្លួន ហើយក៏បានបើកឡានដេញតាម ប្រផាប់ប្រភីង តាំងពីកន្លែងលួចរហូតដល់ស្ពានទីពីរ ខាងជើងទីរួមស្រុកថ្មពួក លើផ្លូវជាតិ 56A តាមទាន់ចាប់បានជនសង្ស័យ ១នាក់ ឈ្មោះ ជី សុហេង ភេទប្រុស អាយុ២២ឆ្នាំ រស់នៅភូមិ អ្នកតា ឃុំថ្មពួក ស្រុកថ្មពួក និងបក្ខពួកម្នាក់ទៀតឈ្មោះ ហាប វេហា ភេទប្រុស អាយុ២៨ឆ្នាំ រស់នៅភូមិរលំជ្រៃ ឃុំភូមិថ្មី ស្រុកថ្មពួក ខេត្តឫបន្ទាយមានជ័យ បានរត់គេចខ្លួនបាត់។ជនសង្ស័យទាំងពីរនាក់ជាមុខសញ្ញាប្រើប្រាស់សារធាតុញៀន ហើយធ្លាប់ជាប់មណ្ឌលកែប្រែភ្នំបាក់ចំនួន៣លើក និងបានដកហូតវត្ថុតាង ម៉ូតូចំនួន ០១គ្រឿង យកមករក្សាទុកនៅអធិការដ្ឋាននគរបាលស្រុកថ្មពួកបណ្តោះអាសន្នតែម្តង។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួននិងបក្ខពួកពិតជាបានប្រើប្រាស់គ្រឿងញៀន និងលួចម៉ូតូប្រាកដមែន។បច្ចុប្បន្នជនសង្ស័យឈ្មោះ ជី សុហេង ត្រូវបានកម្លាំងជំនាញព្រហ្មទណ្ឌ នៃអធិការដ្ឋាននគរបាលស្រុកថ្មពួក ធ្វើការឃាត់ខ្លួន និងរៀបចំកសាងសំណុំរឿង បញ្ជូនខ្លួនទៅស្នងការដ្ឋាននគរបាលខេត្ត ដើម្បីចាត់ការតាមនីតិវិធីច្បាប់៕
