ល្បែងស៊ីសងជល់មាន់ និងអាប៉ោង ជាប្រភពនៃចំណូលរបស់អាជ្ញាធរមូលដ្ឋានឬ បានមិនមានការបង្ក្រាប ខណៈបើកឲ្យលេងយ៉ាងគក្រើកក្នុងទឹកដីឃុំថ្មពូន ស្រុកព្រៃឈរ យ៉ាងដុះស្លែមកហើយនោះ
ខេត្តកំពង់ចាម៖ប្រជាពលរដ្ឋសម្តែងការព្រួយបារម្មជាខ្លាំង ខណៈនៅមូលដ្ឋានរបស់ពួកគាត់មានបើកឲ្យលេងល្បែងស៊ីសងប្រភេទជល់មាន់ និងអាប៉ោង ដោយខ្លះឆ្លងកាត់ពីបណ្តាលស្រុកនិងខេត្តផ្សេងៗ ចូលលេងយ៉ាងពពាក់ពពូន នៅចំណុចចំការចេក ចូលតាមផ្លូវផ្សារបុស្សខ្នុរ ចម្ងាយប្រមាណ ១០០០ម៉ែត្រ ស្ថិតក្នុងឃុំថ្មពូន ស្រុកព្រៃឈរ ជាប់ព្រំប្រទល់នឹងស្រុកចំការលើ ខេត្តកំពង់ចាម ខណៈសមត្ថកិច្ចមិនចុះបង្ក្រាប។
បើតាមអ្នកញៀនល្បែងលេងចាញ់អស់ក្តិតខោបានដឹងថា៖ទីតាំងជល់មាន់និងអាប៉ោងខាងលើនេះ បានបើកដំណើរការជាយូរមកហើយ និងមានការប្រកួតជារៀងរាល់ថ្ងៃ ដោយមានការភ្នាល់ដាក់លុយស៊ីសងចាញ់ឈ្នះទ្រង់ទ្រាយធំ មានមនុស្សពពាក់ពពូនទៅលេងច្រើនកុះករ ព្រោះល្បីកន្លែងនេះមានសុវត្ថិភាពមិនព្រួយបារម្ភពីសមត្ថកិច្ចចុះបង្ក្រាបឡើយ។
ជុំវិញការប្រមូលផ្ដុំគ្នាលេងល្បែងស៊ីសងយ៉ាងគគ្រឹកគគ្រេង ខាងលើនេះដែរប្រជាពលរដ្ឋដាក់ការសង្ស័យថា ប្រហែលមានការត្រូវរ៉ូវគ្នារវាងអាជ្ញាធរនឹងសមត្ថកិច្ចពាក់ព័ន្ធក្នុងមូលដ្ឋាន ជាមួយម្ចាស់បនល្បែងហើយមើលទៅ បានជាម្ចាស់ទីតាំងខាងលើបើកបានដោយរលូនបែបនេះ។ដូច្នេះពួកគាត់ស្នើឲ្យស្នងការនៃស្នងការដ្ឋាននគរបាលខេត្តកំពង់ចាម មានវិធានការផងទាន!!!! ដើម្បីឲ្យស្របតាមគោលនយោបាយភូមិ ឃុំមានសុវត្ថិភាព របស់ប្រមុខរាជរដ្ឋាភិបាលកម្ពុជា ដែលបានដាក់ចេញ បើពឹងលើអជ្ញាធរមូលដា្ឋនប្រហែលមិនអាចទៅរួចទេ ដោយសារល្បែស៊ីសងខាងលើនេះបើកឲ្យលេងជាយូរមកហើយ មិនឃើញសមត្ថកិច្ចចុះណែនាំ ឬបង្ក្រាបនៅឡើយរហូតមកដល់ពេលនេះ។ ព្រោះថាមានល្បែងស៊ីសងតែងតែកើតមានឡើងនូវបទល្មើសផ្សេងៗដូចជា ចោលួច ចោប្លន់ អំពើចោរកម្ម អំពើហឹង្សាក្នុងគ្រួសារ និងបទល្មើសជួញដូរ និងប្រើប្រាសគ្រឿងញៀន ព្រោះមានពលរដ្ឋខ្លះចាញ់ល្បែងលក់អស់ទ្រព្យសម្បត្តិ ដីធ្លី ព្រមទាំងជំពាក់បំណុលគេជុំទិស បង្កជាបញ្ហាអសន្តិសុខសង្គមជាដើម ទាំងនេះធ្វើឲ្យប្រជាពលរដ្ឋរស់នៅ ដោយភាពភ័យខ្លាចទៀតផង។
ពាក់ព័ន្ធករណីល្បែងស៊ីសងនេះ បើយោងតាមច្បាប់ស្តីអំពីការបង្ក្រាបល្បែងស៊ីសងជំពូក១ មាត្រា១ ត្រូវហាមឃាត់ជាដាច់ខាតការលេងល្បែងស៊ីសងគ្រប់ប្រភេទ នៅគ្រប់ទីកន្លែងទូទាំងព្រះរាជាណាចក្រកម្ពុជា ,ជំពូក៣ មាត្រា៤ ជនណាលេងល្បែងស៊ីសង ជននោះត្រូវផ្តន្ទាទោសពិន័យជាប្រាក់ឬដាក់គុក។ក្នុងជំពូកដដែរ មាត្រា១១ ជនណាដែលចេញមុខការពារវង់ល្បែងស៊ីសងឬបនល្បែងស៊ីសងគ្រប់ប្រភេទនៅទីណាក៏ដោយត្រូវផ្តន្ទាទោសដាក់គុកពី១ឆ្នាំ ដល់៥ឆ្នាំទៀតផង៕មានវគ្គបន្ត
