ខេត្តតាកែវ៖ឯកឧត្តម ឡាំ ជា រដ្ឋលេខធិការក្រសួងមហាផ្ទៃ តំណងដ៏ខ្ពង់ខ្ពស់ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៅព្រឹកថ្ងៃទី១៥ ខែកញ្ញា ឆ្នាំ២០២២នេះ បានអញ្ជើញជាអធិបតីភាពក្នុងពិធីប្រកាសចូលកាន់មុខតំណែងអភិបាលរង នៃគណៈអភិបាលខេត្តតាកែវ ថ្មីចំនួន ៥រូប ។ ដែលពិធីនេះក៏មានការអញ្ជើញចូលរួមដោយ ឯកឧត្តម លោកជំទាវ ប្រតិភូអមដំណើរ ឯកឧត្តម យស ណាស៊ី ប្រធានក្រុមប្រឹក្សាខេត្ត ឯកឧត្តម អ៊ូច ភា អភិបាលខេត្តតាកែវ លោក លោកស្រី អភិបាលរងខេត្ត លោក លោកស្រី ប្រធាន អនុប្រធានមន្ទីរអង្គភាពជុំវិញខេត្ត លោកឧត្តមសេនីយ៍ត្រី មេបញ្ជាការកងរាជអាវុធហត្ថខេត្ត លោកឧត្តមសេនីយ៍ទោ ស្នងការនគរបាលខេត្ត លោកឧត្តមសេនីយ៍ត្រី មេបញ្ជាការតំបន់ប្រតិបត្តិការសឹករងខេត្ត លោក អភិបាលក្រុង ស្រុក និងលោក លោកស្រី មេឃុំ ចៅសង្កាត់ ទូទាំងខេត្តចូលរួមផងដែរ។
ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ បានមានមតិស្វាគមន៍ និងរាយការណ៍ដោយសង្ខេប ជូនឯកឧត្តមរដ្ឋលេខាធិការ និងអង្គពីធីទាំងមូល អំពីវឌ្ឍនភាពការងាររបស់ខេត្តតាកែវទាំងមូល ព្រមទាំងវិធានការបង្ការ ទប់ស្កាត់ និងការដោះស្រាយផលប៉ះពាល់នានា បណ្តាលមកពីជំងឺកូវីដ–១៩។
ជាកិច្ចបន្ទាប់ ឯកឧត្តម ឡាំ ជា រដ្ឋលេខាធិការក្រសួងមហាផ្ទៃ បានអញ្ជើញថ្លែងសុន្ទរកថាកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងនាពេលកន្លងមករបស់ក្រុមប្រឹក្សាខេត្ត គណៈអភិបាលខេត្ត រដ្ឋបាលខេត្ត អង្គភាពជំនាញ និងកងកម្លាំងប្រដាប់អាវុធគ្រប់លំដាប់ថ្នាក់ក្នុងដែនដីខេត្តតាកែវ ព្រមទាំងបានសម្ដែងនូវការអបអរសាទរចំពោះអភិបាលរងខេត្តទាំង ៥រូប ដែលត្រវបានរាជរដ្ឋាភិបាលផ្តល់សេចក្ដីទុកចិត្តតែងតាំងជាអភិបាលរងនៃអគណៈអភិបាលខេត្តតាកែវ។
សូមជម្រាបជូនដែរថា អភិបាលរង នៃគណៈអភិបាលខេត្តតាកែវ ទាំង ៥រូប ដែលត្រូវបានតែងតាំង រួមមាន៖
– លោក យង់ សុវឌ្ឍនា ពីអភិបាលរងខេត្តស្ទឹងត្រែង មកជាអភិបាលរង នៃគណៈអភិបាលខេត្តតាកែវ ។
– លោក ញ៉ែម ស្រស់ អតីតអភិបាលស្រុកព្រៃកប្បាស មកជាអភិបាលរង នៃគណៈអភិបាលខេត្តតាកែវ ។
– លោក ស៊ុត ខុន អតីតអភិបាលស្រុកគិរីវង់ មកជាអភិបាលរង នៃគណៈអភិបាលខេត្តតាកែវ ។
– លោក ទុយ សុភ័ក្រ្ត អតីតអភិបាលស្រុកបូរីជលសារ មកជាអភិបាលរង នៃគណៈអភិបាលខេត្តតាកែវ ។
– លោក ម៉ម កាយ ជាអភិបាលរង នៃគណៈអភិបាលខេត្តតាកែវ ៕ ដោយ ៖ លោក ផូង បញ្ញា
