វេទិកាផ្សព្វផ្សាយ និងពិគ្រោះយោបល់ ក្រុមប្រឹក្សាក្រុងសិរីសោភ័ណ សម្រាប់សង្កាត់ម្កាក់ កោះពងសត្វ និងសង្កាត់ភ្នៀត
ខេត្តបន្ទាយមានជ័យ៖បើយោងតាមមាត្រា៦៥នៃអនុក្រឹត្យលេខ ២១៦ ចុះថ្ងៃទី១៤ ខែធ្នូ ឆ្នាំ២០០៩ ដែលតម្រូវឲ្យក្រុមប្រឹក្សាក្រុងរៀបចំវេទិកាផ្សព្វផ្សាយ និងពិគ្រោះយោបល់ នៅតាមសង្កាត់នីមួយៗ។និយាយជារួមនិងនិយាយដោយឡែក សម្រាប់ក្រុងសិរីសោភ័ណខេត្តបន្ទាយមានជ័យ ក្រុមប្រឹក្សាក្រុង បានរៀបចំវេទិកាផ្សព្វផ្សាយនិងពិគ្រោះយោបល់ជាមួយបងប្អូនប្រជាពលរដ្ឋក្នុងសង្កាត់កោះពងសត្វ និងសង្កាត់ម្កាក់នាព្រឹកថ្ងៃទី៨ ខែកញ្ញា ឆ្នាំ២០២៣។
លោក ជាម សុខ ប្រធានក្រុមប្រឹក្សាក្រុងសិរីសោភ័ណបានមានប្រសាសន៍ថា រាជរដ្ឋាភិបាលនៃព្រះរាជាណាចក្រកម្ពុជាបានសម្រេចធ្វើកំណែទម្រង់រដ្ឋបាលថ្នាក់ក្រោមជាតិ មានលក្ខណៈស៊ីជម្រៅយូរអង្វែងទាំងផ្នែករដ្ឋបាល និងផ្នែកនយោបាយតាមរយៈការបង្កើតដោយក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ ដែលបានកើតឡើងពីការបោះឆ្នោតដោយសមាជិកក្រុមប្រឹក្សាឃុំ សង្កាត់ និងតំណាងផ្ទាល់របស់ប្រជាពលរដ្ឋ។
ការដាក់ចេញនូវគោលនយោបាយកំណែទម្រង់វិមជ្ឈការនិងវិសហមជ្ឈការ ការអនុវត្តតាមរដ្ឋបាលនៃព្រះរាជាណាចក្រកម្ពុជាដែលអនុម័តនៅឆ្នាំ១៩៩៣ គោលបំណងនៃគោលនយោបាយនេះគឺទីមួយ ការកែលម្អនូវប្រព័ន្ធអភិបាលកិច្ចនៅថ្នាក់រដ្ឋបាលនីមួយៗ ដើម្បីជំរុញដល់លទ្ធិប្រជាធិបតេយ្យ។ ទី២ ការជំរុញកិច្ចអភិវឌ្ឍសេដ្ឋកិច្ចនិងសង្គមកិច្ចនៅមូលដ្ឋាន។ទី៣ ការរួមចំណែកកាត់បន្ថយភាពក្រីក្រនៅទូទាំងប្រទេសកម្ពុជា។
លោក ស្រេង សុផល ដែលជាអភិបាលក្រុងសិរីសោភ័ណបានមានប្រសាសន៍ថា ក្រុមប្រឹក្សាក្រុងដែលបានរៀបចំវេទិកាផ្សព្វផ្សាយពីលទ្ធផល ក្នុងឱកាសនេះគឺក្នុងគោលបំណងដើម្បីផ្តល់នូវព័ត៌មានអំពីសកម្មភាពនានារបស់ក្រុមប្រឹក្សាក្រុង និងឆ្លើយតបទៅនឹងសំណើរួមនិងសំណូមពរទាំងឡាយជាក់ស្តែងក្នុងវេទិកានេះ បងប្អូនប្រជាពលរដ្ឋបានធ្វើការលើកឡើងនូវសំណូមពរមួយចំនួន រួមមានបញ្ហាដាក់លូរំដោះទឹក ស្នើសុំការស្តារប្រឡាយ សុំផ្លូ បេតុង ស្នើសុំដាក់បង្គោលភ្លើង គីឡូភ្លើងឡើងខុសប្រក្រតី។
គួរបញ្ជាក់ផងដែរថា ការលើកឡើងនូវបញ្ហាប្រឈមនិងសំណូមពររបស់បងប្អូនប្រជាពលរដ្ឋទាំងពីរសង្កាត់ដែលបានលើកឡើងនេះត្រូវគណៈធិបតីមន្ត្រីជំនាញពាក់ព័ន្ធបានឡើងធ្វើការដោះស្រាយនិងបំភ្លឺជូនដំណឹងបញ្ហាដែលនៅសេសសល់និងបន្តធ្វើការដោះស្រាយ ជូនដល់បងប្អូនប្រជាពលរដ្ឋនៅពេលក្រោយជាបន្តទៀត៕
